बतहा संसार
भोरसँ साँझ धरि
साँझसँ भोर धरि
असलमे भोरसँ भोर धरि
भटकैत रहैत अछि लोक
एकटा सुख्खल रोटीक लेल
दौड़ैत रहैत अछि ओ
अपनासँ पैघ लोक आगू-पाछू
ठिठियाइत अछि ओ पैघ लोक
सड़ल, गेन्हाएल आम जकाँ
फेक दैत अछि नचा कऽ
बहुते दूर छोट लोककेँ
पैघक घुसखोर चमचा जकाँ
ओहि सड़ल आममे
सटैत अछि चुट्टी, भौंरा, बिढ़नी
चूसि लैत अछि मिठास
मने इज्जत, टाका आ खूनकेँ
आब बचैत अछि
कानैत थाकल लोक सन आँठी
ओ आँठी फेर बढ़ैत अछि
गाछ बनि, आम बनि
फेरसँ आँठिये शेष बचैत अछि
छोट सदिखन पैघ लऽग जाइत अछि
आ बचैत अछि छोटोसँ छोट बनि
आखिर एते किए बौआइत अछि,
हकमैत अछि बतहा संसार ?
अमित मिश्र
शनिवार, 17 अगस्त 2013
सदस्यता लें
टिप्पणियाँ भेजें (Atom)
0 comments:
एक टिप्पणी भेजें